الاثنين 22 يناير 2018 - 08:37 مساءا

سنيني ألوف

يناير 11, 2018 1:41 ص

أنا النخله اللي حاضنه النيل
تبوسها الشمس وتعدّي
وانا الساقيه تقول مواويل
ودايره بشهدها تدّي
أنا الطمي اللي دفّى الشمس
وصوت الحب وقت الهمس
ولو جاني عزيز النفس
بياخد أحلى ما عندي
أنا ضحكة أدان الفجر
وترنيم الكنيسه معاه
وانا أم التراب التبر
حجارتي تحس فيها حياه
أنا الهرم اللي بينوّر
وديرماسك ف إيد أزهر
ولو أذنبت باستغفر
واصلّي ركعتين لله
سنابل قمحي من أحمد
وتمر نخيل يكفّينا
ولمّا الدنيا بتبرّد
يدفيني دراع مينا
م انا صوت الإيمان جامعه
جرس حَدّي وأدان جمعه
وانا وقت الضلام شمعه
وقريه تغنّي ومدينه
تاريخي مناره من يومي
سنيني ألوف ما تخلصشي
ولو زادت ساعات نومي
ح اقوم واقعد على عرشي
ولو عقل الجميع ساهي
انا بوضعي كده إلهي
وصوتي الأمر الناهي
وأمري ع الجميع يمشي
تفوت الشمس وتهدّي
عليّا عشان تبوس خدي
وتشرب من عسل نيلي
وتقطف وردتين بلدي
م انا الطمي اللي دفّى الشمس
وصوت الحب وقت الهمس
ولو جاني عزيز النفس
بياخد .. أحلى ما عندي
……………………………………..
ريــــــــــــ صلاح ــــــــــــــ


info heading

info content