الثلاثاء 23 يناير 2018 - 07:59 مساءا

إنت أكيد مش قلبي ولكن إنت جاسوس جوّايا عليّا

يناير 10, 2018 12:19 ص

إنت جاسوس
……………
إنت أكيد مش قلبي ولكن
إنت جاسوس جوّايا عليّا
تنقلُّه الأخبار من عندي
علشان أبقى ف إيده ضحيّه
وامّا بتيجي معايا تخبّي
وبتعمل حركات مش هيّ
لأ وحياتك ..
مش ح اسمحلك
وان دقّيت عمري ما ح افتحلك
شوف بقى مين عندي ح يرتاحلك
ويسيبك تتحكّم فيّا
دانت أكيد مش قلبي ولكن
إنت جاسوس جوّايا عليّا
عقلي ملكته ف إيدي خلاص
يعني ماهوش ح يكون ويّاك
مهما ح تحلف ع الإخلاص
مش ح يروح ف السكّه وراك
ولا ح يسلّملك مفاتيحه
ويسيبك ترميه ف هلاك
علشان عارفك
مهما بتحلف
ترجع تاني ف لحظه وتخلف
بتعيد كل القصّه وتحذف
حلفانك وتقول مش ليّا
إنت أكيد مش قلبي ولكن
إنت جاسوس جوّايا عليّا
قوللي ازاي عارف خطواتك
إمتى بتيجي وإمتى بتمشي
وبلاش تعمل على نيّاتك
أو تكدب وتقول ما اعرفشي
عارفاك عارف مهما تداري
أنا فاهماك يعني ما تحلفشي
كدبك باين
مهما تخبّي
إنت أكيد فعلا مش قلبي
إنما قلبُه وقاعد جنبي
تنقلُّه التفاصيل بالثانيه
لأ وحياتك ..
مش ح اسمحلك
وان دقّيت عمري ما ح افتحلك
شوف بقى مين عندي ح يرتاحلك
ويسيبك تتحكّم فيّا
……………………………………………
من ديوان

معرفش ليه

الشاعرة . ريم صلاح

 


info heading

info content