الأحد 17 ديسمبر 2017 - 05:46 مساءا

حُضن الخيال

ديسمبر 1, 2017 4:35 م

حُضن الخيال
……………
لمّا الحقيقه تكون وجع
يبقى الخيال هو الملاذ
وانا روحي دايبه مشوّره
والخطوه فوق كسر الإزاز
والدنيا إيد ما بتنفردش
ولا عمرها بتدّي اللي عاز
وانا عايزه أشبع م الغرام
ف بموت عطش
قلبي اللي ف القفص انكمش
دبلان كما الورد ف خريف
مع إنُّه لسّه ف الربيع
بس الربيع كان زي طيف
عدّى كما الريح ع الشجر
ساب الشجر هش وضعيف
وكأنُّه عدّى ف إيده سيف
يضرب شمال
يضرب يمين
وانا قلبي قاعد مستكين
يستقبل الطعنات وبس
عطشانه روحي تعدّي شمس
تخطفها من حضن الجليد
وتصُب ف وريدها الدفا
عطشانه ييجي نهار جديد
بدل النهار اللي اختفا
وانا رغم إيدي مكتّفه
بافردها دايما والمسك
لكن ف أحلام المنام
بالمس جبينك باهتمام
واقرا ف عيونك ألف بيت
من طعم أشعار الغَزّل
وادخل ف حضنك أرتوي
يا حبيبي من نهر العسل
واشبع حنان
واشبع أمان
واشبع قُبل
كل اللي مرفوض يتقبل
لكن ف أحضان الخيال
أوصل لحد الإكتمال
تعبير مجاز
لكن بافوق ..
على خطوّه فوق كسر الإزاز
وامّا الحقيقه تكون وجع
يبقى الخيال ..
هو الملاذ
……………………………

من ديوان
دم البراءة
#ريم_صلاح


info heading

info content