الجمعة 15 ديسمبر 2017 - 02:12 مساءا

مستغرب ليه؟ قصيدة – ريم صلاح

أبريل 24, 2015 11:18 ص

مستغرب ليه؟
شايفاك بتبُص ومستغرب
مستغرب ليه ؟
إكمنّي بصوتك بتنغّم ؟
منا عايشه عليه ؟
أومال لو تدخل جوّايا
وتحس اللي بحسّه معايا
وتلف ف دمي وأركاني
وتشوفك فيّا هتعمل إيه ؟
دنا دق القلب اللي ف صدرك
والنَفَس اللي بيخرج منك
بيجيني أكمّل وأعيش بيه
مستغرب ليه؟
أنا لحنك وانت اللي عازفني
أنا صوتك وانت تغنيني
يا حبيبي بلاش بقى تكسفني
واخطفني ف حُضنك دفّيني
شرياني ف إيدك إعزف ( دو )
ووريدي ف أيدك إعزف ( ري )
واطلع ع السلم وانزل بيه
سمّعني اللحن اللي بحبه
وان قلبي ف حُضنك بات خلّيه
ماهو بات م الشوق اللي كاويني
يا حبيبي دا نَفَسك يحييني
وبحس هواك أجمل جنّه
الروح بتسيبني وبتروحلك
علشان بغرامك تتهنّى
الكل بيحلم بالأساطير
وانا بحلم بهواك واتمنّى
إزاي بقى هقدر أستنّى
ساعة ما تعدّي قُصاد منّي
دنا بسمع صوتك يإسرني
دنا وانت معايا بتوحشني
والقلب بيصبح كما عصفور
بيرفرف ع الأشجار ويدور
وف لحظه الدنيا بتشتي عليه
ف بيهرب يتدارى بسرعه
م البرد بيجري عليك عايز
تفتحله الحُضن اللي يدفّيه
مستغرب ليه؟
…………………………..
من ديوان
(خبيني فيك)

قصيدة
مستغرب ليه
ببيت سعد زغلول (بيت الامة )

 

 


info heading

info content