الخميس 18 يناير 2018 - 12:08 صباحا

علشان مخاصمني . من ديوان خبيني فيك . للشاعرة – ريم صلاح

مارس 25, 2015 7:28 م

علشان مخاصمني
مش لقياني …
حسّه كأني غريبه وحاجه
من جوايا بقت نقصاني
حسّه كأنّي ف ليل التوهه
وانا من شكل الضلمه بعاني
حسّه التلج بيسكن بدني
والدم مخاصم شرياني
حسّه كأني غريقه بعافر
كل ما بخرج ..
أغرق تاني
أجري وابُص ف وش مرايتي
بس مرايتي .. مش عارفاني
هيّ ملامحي
ودي تسريحتي
ودي تفاصيلي
ودي نفس الغمّازه ف خدي
ودا مكياجي
ودا فُستاني
إنما برضه .. مش لقياني
مين جاب التجاعيد ف جبيني ؟
مين حط الخطّين ف خدودي ؟
مين سهّاني وشد ورودي ؟
إيه متغيّر ؟
إيه خلاني
حسّه كأني بقيت نُصّين
نُص بيبكي ف توهه وغُربه
ماسك فيّا بقسوه وقوّه
بيدوّر على نُصّه التاني
حسّه كأني حروف مُتقاطعه
محتاجه اللي يكوّن كلمه
شايفه قُصادي العالم زحمه
إنما قلبي مازال وحداني
يبقى أكيد علشان مخاصمني
حسّه بقلبي كمان مخاصمني
حسّه بروحي بتبعد عنّي
رايحه هناك عنده وسايباني
هجري واصالحه وابص ف عينه
جوّه عيونه أكيد .. هلقاني
…………………………..
من ديوان
خبيني فيك

 

 


info heading

info content