السبت 16 ديسمبر 2017 - 12:39 مساءا

هدية للغالية احسان تعلا العين حتى تعلا شعر – رحيمة بلقاس

أكتوبر 15, 2014 10:21 ص

هدية للغالية احسان
تعلا العين حتى تعلا
ويجي الحاجب فوق منها
إلا كان لي في هاذ الدنيا
عوينات بلا بهم
ما نقدر نخلف خلفة
ولا نتبرم على حفرات لعدا
فانت يا حاجبي
يا زينة الرفڭـة
عليَّ حجبت نار الغمّة
ومن حر الغمام
خبتيني في شونك
حسّيت دفاك
ونسيت الغربة
في زمان هاج بمحاينو
وجرجرني في جلايلو
يا زينة الرفڭـة
حكايتك نساتني
قهرة الحڭـرة
على مرمة جمر
طرزت لمخبي في الڭـلب
حرقني… شواني…كواني
وما همني غير همّك
إلّي ما لقيت لو حلّ
وفي الحيرة رماني
ملّي صهد صبرك
في الليل حنحن
مَد ضفيرتو الكحلة
ومن قفاك هزك
مشنوقة …مصلوبة
على كدية الظلمة
وتحت عفطة الظالم
مجدوبة
حلڭـتِ شعورك
وحلفت وانا معاك
ما نرضاو غير بتاج الهمة
على راسنا يضوي
كيف النجمة
ياك حنا يا لالة احسان
يا مولات الهمة والشان
غوانيات
وفي بحور لحروف زهونيات
جري جراك
يا مول العود البرڭـي
راه ما يعرف قدرنا
غير لي يقدر يفهمنا
رحيمة بلقاس

 

 


info heading

info content