الخميس 14 ديسمبر 2017 - 05:06 مساءا

كبر إل ( D ) وروق إل ( G )

يونيو 5, 2013 2:30 ص

بقلم – نورهان عادل

بالظبط هو ده المطلوب … ريلااااااااكس …ومترسمش على وشك 111 … آه واعتبر كل اللي بيحصل حوالي كده مجرد مسرحيه .. ها ؟ يلا نجرب .. بس ياترى هنقدر ؟
طيب اقعد كده واضربها طناش وفكر مثلا ازاى تبقى واد جينتل مان .. آه بص كده الممثل إياه عامل إيه ولابس إيه .. ايوه يابنى هي دى الموضة ركز فيها بقى . . وانتى بصى المطربة إياها بصى اللي قالعاه اقصد اللي لابساه ده لالالا ده عريان أوى عيب أوعى تعملي زيها بس ركزي ف الموضة والستايل والكلام الفاضى ..
طيب تعالوا نغير المحطة ونشوف حاجه غيرها بس وإحنا ريلاكس برده …
بيقولك مش عارف كام شهيد وناس بتضييع وناس بتموت وسوريا بتقع .. يااااااه .. مالك بس وشك اصفر واحمر كده ليه متخافش جماعتنا هيساعدوهم ياجدع أهدى انت بس .. هو انت سوري ؟ أبوك سوري ؟ بتاكل لب سوري ؟ أمال إيه بقى مالك انت ومال سوريا … أقولك حط السماعات واسمعلك كام أغنيه لأوكا واورتيجا ولا حتى عبده موته عشان تهدى أعصابك … وانتى مالك هتعيطى ولا إيه ..لالالالالا روحي ياحبيبتى وفري دموعك دى وانتى بتتفرجى على فريحه ولا على حريم السلطان وشوفي السلطانة هيام هتموت مين النهارده انتى بنوته كيوت مالك انتى ومال المناظر دى
متغيرو المحطة ياجدعااااان … مصر ايوه حلوه دى اتفرجو بقى ويكأنكم بتتفرجو على ذئاب الجبل مثلا آه ومن غير عصبيه يعنى هي العصبية هتفيد بايه ؟؟
بيقولك إيه بقى مفيش ميه مفيش كهربا مفييش أمان ( مفيش حاجه ف البلد غير الإخوان ) طيب وإيه المشكلة ماهما برده الحكام اوعو تزعلوهم بقى دول ناس بتوع ربنا وكله بما يرضى الله … أقولكم حل حلو سيبكم من كل ده وركزوا انتو ف اكتشاف المواهب طبعا أمال إيه إحنا محتاجين المواهب عندنا نقص ف الأصوات اليومين دول اسمعوا أراب أيدول أو ذا اكس فاكتور .
سامعه واحد بيقولى طاب وسد النهضة .. ماله ياحبيبى ؟ ده جميل خالص .. لالالالا محبكش وأنت كده أوعى تعصب نفسك اوعى تغلط ف الكبير .. أقولك حاجه حلوه اكتم غضبك ف قلبك متخافش اعمل زى مابقولك اكتم الغضب لحد مايخرج من جسمك على شكل ورم مثلا .. اليوم الأول هتورم .. التانى هتورم .. التالت هتورم .. وف الرابع تنفجر ويخرج السد والنهضة من قلبك خالص . حتى انك كمان لما تشوف السد قدامك هتلاقى نفسك ف الشارع بتجرى وبتقول ( هيييه هيييه معانا سد معانا سد ) .
طيب هقولك انت عندك سجادة صلاة ؟؟ طيب قوم صلى وادعى ربنا يصلح الأحوال .. آه زى مابقولك كده وفكك من بقى وكبر دماغك من اللي بيحصل ده كأنه ياسيدى فيلم هندي أو مسلسل عربي .. طبعا ماهو أهم حاجه صحتك والضغط والسكر كترو أوى اليومين دول واللي بيقعو الصغيرييين … طيب وماليكم عليا يمين أنا كمان بكبر دماغي لدرجة انى بحس انى شوال غباء ماشى برجلين بني ادم
برااااافو كده حلو أوى .. اوعو بس تفتكروا انى ضد الجماعة لالالا دول حبايبى والكبير ده طبعا مقدرش أتكلم عليه وكله بما يرضى الله . سامعه واحد بيقولى بس اللي بيحصل ده كتير ويجبر اى حد انه يتكلم هقولك ولما تتكلم هيحصل إيه أصلى اللي كان زمان مبيسمعش إنما دلوقتى ( صم بكم عمى ) وكمان الفهم بطئ آه أمال انت فاكر إيه …
طيب عارف هما عاوزين إيه ؟ عاوزينك ساااكت على طول عشان متغلطش أصله عيب وعاوزينك متفكرش عشان دماغك متتعبش ( ناس طيبين أوى ياخال ) .
سامعه حد بيقولى طيب وارتفاع الأسعار ؟؟ أقوله عادى ياسيدى نشاط اقتصادي
طيب وزيادة الجريمة ؟؟ عادى نشاط اجتماعي
طيب والفساد الادارى ؟؟ نشاط سياسي وحاجه عاديه مانا متعودة دااااايما
طيب وتزوير الانتخابات يافالحه ؟ ياسيدى وانت زعلان ليه .. هو أبوك كان مترشح ( حاجه غريبة ياجدع )
طيب والبطالة ؟ الرزق على الله ياعم وكله بما يرضى الله
ألاقى البنت اللي هناك دى بتقولي طيب والعنوسه ياختى ؟ لا بقى متخافيش جماعتنا الحلوين هيحلو الازمه ويجوزونا صغيرين واطمئني يا أختاه
طيب وال … ؟ بس بقى خنقتونى متسألوش كتير عشان متتعقدوش اكتر
طيب ممكن طلب اخير ؟ خير
ممكن اشوف سيادة الرئيس ؟؟ اشمعنى ؟
عشان افتحله ( الدى ) واكسرله ( الجى )

 

55

 


info heading

info content